ட்விட்டர் டுமீல்! - ராம்கோபால் வர்மாவின் அதிரடி

சர்ச்சை கருத்துகளால் வில்லனாகி இருக்கிறார் ராம்கோபால் வர்மா. ஒரு மனுஷன் எத்தனை எதிர்ப்புகளைத்தான் சமாளிக்கிறது என்றெல்லாம் இவர் நொந்துபோனதே கிடையாது. யார், எவ்வளவு அடிச்சாலும் தாங்கிக் கொள்கிறார். ஆனால் நான் ரொம்ப கெட்டவன் என்று மட்டும் அவரே சொல்லிக் கொள்ளும்படிதான் ட்விட்டரில் எழுதி தள்ளுகிறார்.

விநாயகரைப் பற்றி விமர்சித்ததால் இந்து அமைப்புகளின் எதிர்ப்பு ஆளானார். பெண்களைப் பற்றி தரக்குறைவாக கருத்து சொல்லி மகளிர் அமைப்புகளின் கடும் சொல்லுக்கு இரையானார். சமீபத்தில் ’சாவித்ரி’ என தெலுங்கில் ஒரு படத்தைத் தயாரிப்பதாக அறிவித்தார். இது தனது பள்ளி பருவத்தில் பார்த்த சாவித்ரி டீச்சரை மனதில் வைத்து உருவான படம் என சொன்னார். இது விடலைகளுக்கு ஏற்படும் விபரீத எண்ணங்களை சொல்லும் கதை என்பது போஸ்டரைப் பார்த்துதான் சமூக அமைப்பாளர்களுக்கு பளிச்சிட்டது.

சாவித்ரி என்ற தலைப்பை ஸ்ரீதேவி என மாற்றியபோது, மயிலு ஸ்ரீதேவிக்கு கோபம் தலைக்கேறியது. கோர்ட் நோட்டீஸ் அனுப்பிவிட்டார். பெயரை மாற்றவே முடியாது என வர்மாவும் ஒரு முடிவோடுதான் இருக்கிறார். இதற்கிடையில் ஆந்திராவை ஹூட் ஹூட் புயல் தாக்க, ட்விட்டரை வர்மா புயல் தாக்கியது. மகேஷ்பாபு, பவன் கல்யாண், ராம்சரண் தேஜா, ஜூனியர் என்.டி.ஆர், அல்லு அர்ஜுன் என ஒட்டுமொத்த டோலிவுட் ஹீரோக்கள் டீமும் தனித்தனியே புயல் பாதித்த மக்களுக்கு நிவாரணத்துக்காக உதவிகள் செய்தனர்.

உடனே ட்விட்டரைத் திறந்த ராம்கோபால் வர்மா, ’மக்கள் ஒரு படத்துக்கு மட்டும் இவர்களுக்கு 100 கோடி ரூபாய் வசூலித்து தருகிறார்கள். இவர்களோ சில லட்சங்களை மக்களுக்கு கொடுத்திருக்கிறார்கள்’ என சாடியிருக்கிறார். இப்போது ஒட்டுமொத்த டோலிவுட் இண்டஸ்ட்ரியும் இவர் மேல் கடுப்பில் இருக்கிறது. அடுத்ததாக இவர் என்ன சர்ச்சையை கிளப்பப் போகிறார் என இப்போதே சினிமா துறையில் இருப்பவர்கள் கண்ணில் விளக்கெண்ணெய் ஊற்றி கவனித்துக்கொண்டிருக்கிறார்கள்.

முன்புபோல பிஸியா இல்லாம சும்மா இருக்கிறதால இப்படி ட்விட்டரில் மத்தவங்களை ரிவீட் அடிக்கலாமா வர்மா சார்?!

- ஜியா உல் ஹக்